90. Ananın yataq otağı, mənzil
– axşam
Növbəti
kadrda Cokerin üzünü görmürük.
İri plan –
bloknot. Coker bloknotu vərəqləyir və Brüs Veynin çırılmış ağ-qara fotosuna
baxır. Yenidən vərəqləyir - əvvəlki sətrə qədər: iri plan- “Ümidvaram ki, mənim ölümümdə həyatımdan daha
çox məna olacaqdır”.
91.
Qonaq otağı, ananın mənzili – gecəyə yaxın
Coker
Rendalın qanlı şalvarından pul kisəsini çıxarıb bütün nağd pulu götürür.
İri plan –
Rendalın kəmərindən görünən tapança dəstəyi. Cokerin əli ani olaraq tapançaya tərəf
uzanır.
92.
Mətbəx, ananın mənzili – gecəyə
yaxın
Coker kağızda
yazır: “Bu gün axşam Mürrey Franklinin şousu olacaq. Mütləq bax!”.
Coker kağızı
və Rendalın pullarını zərfə qoyur. Zərfi çevirib yazır – “Sofi üçün”.
93.
Qonaq otağının pəncərəsi, ananın mənzili –
gecəyə yaxın.
İri plan –
Kürən pişik pəncərədə əyləşib, diqqət etsək, nəsə bir qəribəlik
duyarıq...Pişiyin pəncərədə əksi yoxdur.
Coker pəncərəni
açıb pişiyi yanğın pilləsinə qovur.
COKER – Hə,
get. Azadsan.
Pişik,
Cokeri əbədi tərk etməzdən əvvəl, bir
müddət Cokerə baxır.
Coker pəncərəni
bağlayanda, onun xəfif əksini şüşədə görürük.
94.
Dəhliz, çoxmənzilli bina – gecəyə
yaxın
Kamera
Cokeri təqib edir – Coker azsürətli addımlarla dəhlizdə Sofinin mənzilinə tərəf
gedir. Onun yaşıl saçları arxaya daranıb.
Coker pas
rəngli nimdaş geyimdədir, kostyumu torba kimi sallanır. O, zərfi Sofinin qapısı
qarşısında qoyur, cibindən nəzə çıxarıb, qapıda qoyur və gedir.
Coker dəhlizlə
gedəndə, görürük ki, o, ucunda güllər olan çubuğunu Sofinin qapısı önünə
qoymuşdur.
95.
Lift, dəhliz – gecəyə yaxın.
Cokeri
arxadan görürük, o liftə daxil olur, qapı bağlananda, Coker üzünü bizə tərəf çevirir
və nəhayət, onun obrazını görürük. Yaşıl saçları arxaya daranıb, öldürdüyü gənclərdən
biri kimi... Cokerin üzündə qalın ağ qrim var, qırmızı burun... gözləri üstündə
və altında tünd-göy xətlər... Anasının qırmızı dodaq boyası Cokerin ağzını
kobud qalın xətlə haşiyələyib. Lampaların sərt işığı altında o, Öz maskasının dəli
variantı kimidir.
Qapı onun
yeni üzü qarşısında bağlanır. Zəng səsi.
96.
Çoxmənzilli bina – axşam
Coker
binadan çıxanda gün batır, Harriti və Berk nişansız Ford avtomobilindən düşürlər.
HARRİTİ –
Ey, Artur, hara gedirsən?
BERK – Elə
bilirdim səhər bölməyə gələcəksən.
Coker
qaçmağa başlayır.
Harriti
onun arxasınca qaçır, Berk isə avtomobilə minir.
97.
174-cü küçə, iki döngə
Coker öz məhəlləsindən
prospektə çıxır, ikizolaqlı küçədən avtomobillərlə
dolu yola baxmadan keçir, düz qarşısında sarı taksi peyda olur. BAMM!
Taksi
Cokerə dəyir, zərbədən Coker yuxarı hoppanıb, avtomobilin üzərinə düşür.
Asfalta yıxılır.
Taksinin
arxasındakı digər avtomobil tez qarşı zolağa sürür ki, Cokeri əzməsin və
qarşıdan gələn yük maşını ilə toqquşur. Küçənin hər iki tərəfində avtomobillər
sürüşür, qəza törətməməyə çalışırlar. Xaos. Coker ayağa qalxır. Bədəni ağrıyır.
Harriti
xidməti tapançasını çıxarıb Cokerin ardınca qaçır. Berk qəza səbəbindən tıxacda
qalır və avtomobildən sıçrayıb çıxır.
Coker axsaya-axsaya
üzü aşağı, metroya tərəf qaçır.
98. Yerüstü stansiya, bir neçə addımlıqda
Coker tələsik
addımlarla pilləkənlə yuxarı qalxır, üzündən, yağlı ağ qrimi yayaraq, tər
süzülür. Coker pilləkənin başına çatanda
arxaya dönüb baxır və aşağıda Harriti ilə Berki görür.
99.
Platforma, yerüstü stansiya
Coker
adamla dolu platforma ilə aşağı düşür, sərnişinlər mərkəzə gedən qatarı gözləyirlər.
Qatar etirazçılarla doludur, onlar meriya qarşısındakı mitinqə tələsirlər. Əksəriyyətinin
əlində plakatlar, üzlərində kloun maskası var. Kimsə kloun kimi qrimlənib.
Coker
arzulayır ki, qapılar tez bağlansın. Lakin yox – iki detektiv, qapılar bağlanan
an özünü qatara dürtür.
100.
Qatar (hərəkətdə)
Coker səs-küylü
qatarda, sərnişinləri yara-yara qonşu vaqona keçir. Qatar yerin altına keçdikdə,
işıqlar yanıb-sönür.
Coker
Berklə Harritiyə baxır – onlar polis nişanını və böyürlərindəki tapançanı göstərərək,
sərnişinlərə nəsə qışqırırlar.
Coker
eşidir ki, bəzi sərnişinlər qəzəb içində polislərə nəsə cavab verirlər. Coker
yoluna davam edir, plakatlı-kloun maskalı nümayişçilərin yanından keçir –
plakatlarda “Müqavimət göstər!”, “Mən bəyəm klounam?”, “Şəhəri xilas edin,
varlıları öldürün!” yazılıb.
İki
detektiv izdihamı yara-yara gedərək, hər kloun maskasına baxır, Cokeri
axtarırlar. Klounlar Cokerə elə oxşayırlar ki... Detektivlər camaatı yoldan itələyirlər,
nəsə qışqırırlar.
Coker hiss
edir ki, Harriti və Berk ona yaxınlaşırlar. Sayrışan işıqda Coker sərxoş bir
oğlanı (20 yaşda) görür, onun üzündəki kloun maskasını dartıb çıxarır. Sərxoş
oğlan Cokeri vurmaq istəyir, amma o kənara çəkilir və sərxoş oğlan bir
başqasına sillə ilişdirir. İzdiham arasında
dava başlayır.
Coker
kloun maskasını taxıb bu xaosun içində sakit dayanıbdır.
Harriti və
Berk Cokerin qırmızı kostyumunu dalaşan sərnişinlərin arasında görürlər. BERK
tapançasını çıxarır.
BERK
(bağırır) - Hamı yerə! Uzanın! Hotem polisidir!
Kütlə
eşitmir, dava edir.
Berk
Cokeri görür. Kütləyə bağıraraq, onu yarıb keçmək istəyir, amma ona qulaq asan
yoxdu. Berk etirazçıları yolundan itələməyə başlayır və kütlə bu dəfə onunla və
Harriti ilə dava edir. Detektivlər tapançalarını kütləyə tuşlayırlar, panika
içində bağırırlar ki, adamlar yol versinlər, bu zaman kimsə Harritinin
tapançasını onun əlindən almaq istəyir.
BAM! Güllə.
Berk kütləyə
atış açır, qatar stansiyaya yaxınlaşır. Sərnişin yerə yıxılır. Digər klounlar dəli
kimi coşurlar. Ani olaraq, görürük ki, Coker sakit halda bu xaosdan uzaqlaşır.
Qatardan düşən kimi, o kloun maskasını çıxarıb atır və platformadakı kütlə
arasında gözdən itir.
101.
WGCTV studiyası, Franklinin teatrı, şəhərin mərkəzi – axşam.
Bilet
almış insanlar Mürrey Franklinin şousunu həyəcanla gözləyirlər.
Qapının
yanındakı pavilyonda afişa var – “Bu günkü qonaqlarımız Lens Reynolds, Doktor
Salli Fridman. Və xüsusi qonaq”.
Qapılar
açılır və publika içəri daxil olur.
102.
Kulis arxasında qapı, Franklinin teatrı, döngə - axşam
Təsadüfi pərəstişkarlar
və avtoqraf ovçuları kulisarxası qapıların yanında axşam qonaqlarının gəlişini
gözləyirlər.
103.
4B studiyası, səhnə - axşam
Tamaşaçılar
studiyaya daxil olub, zalda, divar boyu yerləşən enli tribunalarda əyləşirlər.
Tavandan üç televiziya monitoru sallanır, onlar tamaşaçılara tuşlanıb. Aşağıda
üç studiya kamerası var, hər yer qara kabellərlə doludur.
Şou səhnəsi
hələ də qaranlıqdır. Lakin biz səhnədəki masanı, qonaqlar üçün qoyulmuş kürsüləri,
Don Ellis və onun caz orkestrini, böyük göy pərdəni sezə bilərik.
104.
Dəhliz, Franklinin teatrı – axşam
Şounun
aparıcısı Mürrey Franklin (60 yaşında), adətən zirək və məzəli təbəssümlü, indi
qanıqara halda sürətli addımlarla dəhliz boyu, boz qrim otaqlarına tərəf gedir.
Yanında prodüsser Cin Ufland (60 yaş) addımlayır. Prodüserin əlində şounun
burulmuş proqramı var.
CİN UFLAND
– Sən özün onu görməlisən, Mürrey. Şəhərdə baş verənlərə görə biz onu səhnəyə
buraxa bilmərik.
M.FRANKLİN
(əsəbi) – Aman Allah, Cin, mənim vaxtım yoxdur. Sindi bütün günü zəhləmi töküb.
UFLAND – O
hələ də sənə hirslidir?
M.FRANKLİN
– Üç nikah mənə heç nəyi öyrətmədi... Nəyə baxım? Bilirəm ki, psixdi. Niyə onu
dəvət etdik... axmaqlıqdır.
Sarışın gənc
praktikant qız əks istiqamətdə onların yanından keçir. Qız əsəbi gülümsəyərək
yoluna davam edir. Hər iki kiçi çevrilib onun arxasına baxırlar. Franklin
Urfanda göz vurur.
UFLAND
(başını tərpədərək, gülümsəyir) – Deyirəm sənə, onu görməlisən. Düşünürəm ki,
böyük risk edirik. Bu dəli hər şeyi zay edəcək.
105.
Qrim otağı, Franklinin teatrı
Coker
darısqal qrim otağındakı balaca divanda əyləşib, divardan asılmış televizor ilə
yerli xəbərlərə baxır – metro stansiyasından canlı kadrlar göstərilir, Berk kütləyə
atəş açır, meriya qarşısında mitinq, polislərlə toqquşma...
Coker
bacardığı qədər özünü səliqəyə salır. Yağlı ağ qrim səliqəlidir, yaşıl saçları
arxaya daranıb. Qırmızı dodaqları çox qurudur.
Franklin və
Urvand qapını döymədən qrim otağına daxil olurlar. Coker divandan qalxıb əlini
Mürreyə uzadır. Mürrey Cokerin üzünü görüb dayanır.
COKER
(Mürreyin əlini sıxaraq) – Mürrey, inana bilmirəm ki, buradayam.
UFLAND - Ey, bu mister Franklindir, bir qədər ədəbli
ol.
M.FRANKLİN
– Səsini kəs, Cin. (Cokerə) – Hər şey qaydasındadır. Belə yaxşıdır. Şouya gəldiyiniz
üçün təşəkkür edirəm.
COKER –
Zarafat edirsiz? Siz sağ olun ki, bu imkanı mənə yaratmısınız. Həmişə sizin
şouya baxıram. Anam bir verilişi də ötürmürdü.
Mürrey onu
dinləmədn başını tərpədir, bunu əvvəl də eşidib.
M.FRANKLİN
– Bəs üzünə nə olub? Etiraz əlamətidir?
COKER –
Yox, buna inanmıram. Heç nəyə inanmıram. Düşündüm ki çıxışım üçün belə daha
yaxşıdır.
UFLAND (məyus
halda) – Sizin çıxışınız? Məgər siz metrodakı qətldən xəbərsizsiniz? İki polisi
kütlə yaman döyüb. Heç nə eşitməmisiniz?
Coker
sanki indi qəhqəhə çəkəcək. İndicə xəbərlərdə hər şeyi göstəriblər. O, gülüşünü
saxlamaq üçün dərindən nəfəs alır.
COKER –
Yox, xəbərim yoxdu.
Cin və
Mürrey baxışırlar.
UFLAND –
Onu səhnəyə buraxsaq, tamaşaçılar narazı olacaq. Bəlkə çıxışın bir qismini...
Mürrey bir
saniyəlik fikrə gedir.
M.FRANKLİN
– Bu ağlma batır. Zamanındadır. Əsəbidir. Təhlükəlidir. Ən yaxşı komediya – hər
şey yerində olan komediyadır. Biz bunu edəcəyik.
Cin
gicgahlarını ovuşdurur, Mürreyin fikrini bəyənmir, amma Mürrey bossdur.
COKER – Təşəkkür
edirəm, Mürrey.
M.FRANKLİN
(təbəssümlə, ərkyana) – Bir neçə qayda var. Söyüş söymək olmaz, “rənglilər”
haqqında zarafat olmaz, bizim şou sanballı şoudur, aydındır? Siz Doktor Sallidən
sonra çıxış edəcəksiniz. Kimsə sizi çağırmağa gələcək. Yaxşı?
Coker
başını tərpədir. Mürreyə gülümsəyir.
Mürrey və
Cin çıxıb gedərkən, bir-birinə istehzalı təbəssüm edirlər.
COKER –
Ey, Mürrey, kiçik xahiş olarmı? Mənim növbəm çatanda, Coker kimi elan edin.
Müreey və
Cin ona baxırlar.
UFLAND – Nə?
Əsil adınıza nə olub ki?
COKER –
Düzü, əsil adımı bilmirəm.
Coker
gülümsəyir, Mürreylə Cin anlamırlar ki, o, zarafat edir ya yox.
COKER –
Bundan başqa, keçən dəfə siz məni elə elan etmişdiniz, xatırlayırsınızmı,
Mürrey?
M.FRANKLİN
(Cinə) – Doğrudan?
UFLAND –
Bilmirəm.
M.FRANKLİN
(Cokerə) – Əgər belə deyirsənsə, oğlum, qoy Coker olsun.
Mürrey
qapını düz onun üzünə bağlayanda, Cokerə
gülür.
Çevirdi - Sima
Hiç yorum yok:
Yorum Gönder