Orijinal ssenari – Tod Fillips və Skot Silver
Bu əhvalatı
Warner Bros.-un ənənəvi filmi kimi qəbul edirik. Qoçaq, bizə
yaxın və qəribə-məzəli personajlar gerçək dünyada yaşayırlar. Hadisələr keçmişdə
cərəyan etsə də, bu, filmdə heç vaxt qeyd edilmir. Tutaq ki, 1981-ci ildir. Çox
narahat zamandır. Hotem şəhərində cinayətkarlıq rekordlar qırır. Şəhəri zibilçilərin
6 həftəlik tətili iflic edib. “Kasıblar”
və “varlılar” arasında fərq fiziki şəkildə duyulur. Arzular əlçatmazdır, onlar
sayıqlama ideyasına çevrilir.
*
Tamamilə
sınmış bir insanın gülüşü eşidilir.
1. 1. Səhiyyə şöbəsi, ofis. Səhər.
30 yaşlı
Artur ön plandadır. Güclü gülüşdən onun gözləri yaşarır. O, halına nəzarət etməyə
çalışır. Qara kirli saçları dolaşıqdır. Əynində nimdaş, rəngləri solğun,
papaqlı narıncı gödəkçə var, boynundan
istifadədən nazilmiş köhnə boz şərf
sallanır. Ağzının kənarlarında az sezilən iki çapıq izi var. Və Artur
sanki daim gülür...
Artur işi
başından aşan sosial işçinin (50 yaşlı afro-amerikan qadın) qarşısında əyləşmişdir.
Qadının darısqal və təmirsiz ofisi darısqal və təmirsiz binada yerləşir.
Qadının qarşısında qovluqlar dağı ucalır. Qadın öz masası arxasında əyləşmişdir
və Arturun sakitləşməsini gözləyir. Nəhayət, Artur gülməyi saxlayır. Dərindən nəfəs
alıb, fasilə edir ki, gülüşünün bitdiyini təxmin etsin.
COKER – Günah məndədir, ya dünya dəli olur?
Gülüşə baxmayaraq, onun gözlərində əsil dərd var. Artur sınmışdır. Görünür, neçə gündür ki, yuxusuzdur.
SOSİAL
İŞÇİ – Hər şey həqiqətən mürəkkəbdir. İnsanlar narahatdır, onlar çətin vəziyyətdədirlər.
Hamı iş axtarır. Zibilyığanların tətili elə bil bitməyəcək. Çox çətin zəmanədir.
Bəs siz necəsiniz? İşdə vəziyyət necədir? Əvvəlki kimi, işinizi bəyənirsinizmi?
COKER – Bəli!
Demək istəyirəm ki, hər gün müxtəlif keçir, xoşuma gəlir. İnanmıram ki, nə
vaxtsa ofisdə, yazı masası arxasında işləyə biləm... (pauzadan sonra) – İnciməyin...
Qadın
gülümsəyir. Kağıza nəsə qeyd edir. Saata baxır – növbəti pasiyentin vaxtıdır.
S.İŞÇİ – Hələ
də gündəlik yazırsınız?
COKER
– Hər gün.
S.İŞÇİ –
Əla. Gündəliyi gətirmisiniz?
COKER –
(mövzudan yayınaraq) – Bağışlayın. Nəyi gətirməliydim?
S.İŞÇİ (hövsələsiz halda, artıq vaxtı yoxdur) –
Artur, keçən dəfə tapşırmışdım ki, gələndə gündəliyinizi gətirəsiniz. Gətirmisiniz?
COKER – Bəli,
mem.
S.İŞÇİ –
Baxa bilərəm?
Artur
könülsüz halda çantasından işlənmış bir bloknot çıxarır və qadına verir.
COKER – Bu
yalnız gündəliyim deyil, ora mən zarafatları, maraqlı fikirləri, müşahidələrimi
də yazıram. Axı sizə demişdim, komediya aktyoru, stend-ap komik olmaq istəyirəm.
Qadın,
Arturu dinləmədən gündəliyi vərəqləyir.
S.İŞÇİ –
Yox, deməmişdiniz.
COKER –
Demişdim.
Qadın
cavab vermir, gündəliyi vərəqləməkdə davam edir.
S.İŞÇİ –
Ah, bəli... Çünki ananız deyir ki, siz “insanlara sevinc və gülüş gətirməlisiniz”,
elədir?
COKER – Elədir.
Gündəlikdə
yazılmış səhifələr görürük, bəzi yazılar
səliqəli, bəzən səliqəsiz xətlə yazılıb; həmçinin porno-jurnallardan kəsilmiş şəkillər
və bir neçə əl ilə çəkilmiş rəsmlər də vardır.
Arturun
üzündən qəzəb hissi keçir. Görürük ki, o, əsəbi halda sağ qaşını qaşıyır. Özünü
sakit saxlamağa çalışır. Qaşının yarısı yoxdur, deməli, Artur tez-tez belə
edir.
COKER –
Bilmirdim ki, siz bunları oxumaq istərsiniz.
Sosial
işçi ona baxır, sonra gündəlikdə gördüyü nəsə onu fikrə qapdırır.
S.İŞÇİ –
“Ümidvaram ki, mənim ölümümdə, həyatıma nisbətən daha böyük məna olacaqdır”.
Qadın
Artura baxır, Artur da ona baxır, sonra kinayə ilə gülümsəsə də, bunu gülməli
hesab etmir.
COKER – Mən,
sadəcə...
S.İŞÇİ –
Gündəliyi oxumağım sizi məyus edir?
COKER (bir
qədər irəli əyilərək) – Yox, sadəcə yazdıqlarım yalnız mənə aiddir,
anlayırsınızmı?
S.İŞÇİ –
Anlayıram. Sadəcə əmin olmaq istəyirəm ki, siz bunun öhdəsindən gələcəksiniz.
Qadın gündəliyi
Artura qaytarır. Artur gündəliyi dizləri üstə qoyur.
S.İŞÇİ –
Ananız necədir? Özünü necə hiss edir?
COKER –
Çox zaman pisdir, amma yaxşı günləri də olur. Mən indi onun yanındayam və bu
ona böyük dəstəkdir. Onun həqiqətən mənə ehtiyacı var.
S.İŞÇİ –
Görünür, siz evə qayıdandan bəri, o çox xəstələnir.
COKER
(başını yelləyərək) – Bəli, yaxşı ki, mən evdəyəm. Sonuncu tutmadan sonra mən
hospitalda yatanda, xəstəxanaya gəlmək anama çox çətin idi.
Qadın yenə
saata baxır, artıq növbəti görüşə getməlidir.
S.İŞÇİ –
Yaxşı. Yenə 2 həftədən sonra görüşərik?
Artur
başını yelləyir, amma əyləşməkdə davam edir. Qadın ayağa qalxır ki, Artur çıxıb
getsin.
S.İŞÇİ -
Artur, mən sizə nə iləsə kömək edə bilərəmmi?
Növbəti pasiyent məni gözləyir.
Artur əyləşməkdə
davam edir.
COKER – Bəli,
bilmək istəyirdim, siz həkimdən xahiş edə bilərsiniz ki, dərmanların dozasını
artırsın? Mənə elə gəlir ki, heç nə kömək etmir.
S.İŞÇİ
(Arturun xəstəlik kartına baxaraq) – Bilirsiz hansı dərmanların?
Artur
inkar işarəsilə başını tərpədir.
S.İŞÇİ –
Yuxunuz varmı?
COKER
(aldadır) – Az yatıram.
Qadın yenə
də karta baxır.
S.İŞÇİ –
Artur, siz 7 müxtəlif dərman qəbul edirsiniz. Onlardan sizə fayda olmalıdır.
Nəhayət,
Artur ayağa qalxır. Rəngi solmuş narıncı gödəkçəsini düymələyir. Qadına baxır:
COKER – Mən özümü bu qədər pox kimi hiss etmək istəmirəm.
2. Hotem şəhərində meydan. Mərkəz. “Kenninin musiqisi” dükanı
Meydan
avtobillə doludur. Maşınlar fasiləsiz siqnal verir, piyadalar səkidə toplaşır.
Nəhəng reklam lövhələri, böyük afişalar. Hər yerdə zibil dolu kisələr
qalaqlanır. Şəhərin səs-küyü arasında biz şən və getdikcə artan bir melodiya
çalan pianino səsini eşidirik.
İzdihamlı
küçənin o biri tərəfində, müsiqi dükanının yanında Arturu görürük. O, kədərli
avara-kloun geyimindədir. Bu onun işidir. Geyimi nimdaşdır, üzündə tündrəngli qrim, böyük burun görünür,
ağzı ağ rənglə haşiyələnib, kənarları
aşağı əyilib.
Arturun əllərində
yazılı plakat var: “Hər şey təcili satılmalıdır!” Mağazanın üstündəki bannerdə
“Biznesi bağlayırıq” sözləri yazılıb. Arturun arxasında bir qoca kişi pianino
çalır. Artur və qoca alıcıların diqqətini cəlb etmək üçün oradadırlar.
Artur
musiqi sədası altında balaca Çarli Çaplin kimi hərəkət edir. Lakin insanların
çoxu əhəmiyyət vermədən yan keçirlər. Bəziləri səhvən Artura dəyirlər.
Artur 5
yeniyetmədən ibarət bir qrup görür, 15 yaşından böyük olmayan uşaqlar Artura tərəf
gəlirlər. Artur onların yolundan çəkilir. Arturu görən uşaqlar ucadan gülürlər,
ona sataşmağa başlayırlar.
Artur
onlara fikir vermir, öz işini yaxşı yerinə yetirməyə və ləyaqətini qorumağa
çalışır. Plakatı əlində tutaraq, rəqs etməkdə davam edir. Uşaqlardan biri
plakatı Arturun əlindən təpiklə vurub yerə atır.
1-Cİ
YENİYETMƏ – Gəl mənimkini əm, kloun!
Digər
uşaqlar gülürlər. Artur dinmir, əyilib plakatı yerdən götürmək istəyir, bu
zaman başqa bir oğlan arxadan Arturun yanına bir təpik vurur.
2-Cİ YENİYETMƏ
– Uuuuupppsss!
Artur üzü
üstə səkiyə yıxılır. Qəribə olsa da, piano çalan qoca daha da ruhlanır, uşaqlar
isə daha ucadan gülürlər. Uşaqlardan biri plakatı götürüb qaçır, digər uşaqlar
da, hərəkətli avtomobillərin arasından sivrilərək, onun arxasınca qaçırlar.
Artur
ayağa qalxır və uşaqları təqib edir ki, plakatı geri alsın. Bir taksi az qalır
onu vursun, növbəti an Artur başqa bir taksinin qarşısından yayınıb kənara
keçir, taksi yolda dayanır, Artur qaçmağa davam edir. Adamlar dönüb ona
baxırlar – küçədə qaçan kloun, yəqin bu, nəsə bir zarafatdır.
3. Tin, Hotemin döngəsi – davam
5 oğlan
adamla dolu küçədə hələ də klounu gülərək ələ salırlar. Son saniyədə onlar qəfildən
sağa, döngəyə dönürlər.
Artur nəhəng
qırmızı çəkmələri ilə sürüşüb yıxılaraq, sürətlə döngədən yan keçir, qalxıb
uşaqların dalınca qaçır. Uşaqların irəlidə qaçdığını görür.
Tap!
Hardansa klounun üzünə zərbə dəyir. O yerə yıxılır. Uşaqlardan biri döngədə dayanmış
avtomobillərin arasında gizlənərək, Arturu plakatla vurur, plakat zərbədən iki
yerə bölünür.
Digər
uşaqlar Artura yaxınlaşırlar. Artur plakatı götürmək üçün əlini irəli uzadır.
Uşaqlar onu təpikləyirlər. Bu cox ağır mənzərədir. Küçədə heç kim dayanmır və kömək etmir.
İri planda
– yerdəki klounun üzü. Onun üzündən axan tər qrimi yayır. Kloun bildiməsə də,
ağrı hiss edir. O, döyüldüyünə susqunluqla dözür.
Klounun
üzündə uyğunsuz narazı ifadə vardır.
4. Şəhər avtobusu (yola düşür) – axşamçağı
Artur sərnişinlə
dolu avtobusun arxa tərəfinə keçir, axsaya-axsaya addımlasa da, başını dik
tutub.
Üzündəki
qrim yuyulub, kloun geyimi və əşyalar Arturun çiynindən asılmış böyük bazar
torbasındadır. Üzünün bəzi yerlərində yağlı ağ boya ləkələri hələ də görünür.
Artur
avtobusun arxa hissəsində boş yer tapır. Anasının dizləri üstündə əyləşmiş, sifəti
ağlamaqdan şişmiş 4 yaşlı kədərli bir qız görür. Qızın anası irəli baxır, lakin
kürəyindən hiss edilir ki, ana qəzəblidir. Artur görür ki, qız kədərlə dolu
gözləriylə düz ona baxır. Artur bilmir haraya baxsın, özünü utancaq və balaca
oğlan kimi hiss edir. Kloun kimi gülümsəyərək, o, qızla oynamağa başlayır,
üzünü əlləriylə gah bağlayır, gah açır. Qız Artura baxır və sıxın-sıxın gülməyə
başlayır.
ANA
(Artuta tərəf dönüb əsəbi halda) – Uşağıma qəmiş olma.
COKER – Qəmiş
olmuram... mən sadəcə...
ANA (onun
sözünü kəsir) – Sadəcə əl çək!
Qəfildən
Artur ucadan qəhqəhə çəkməyə başlayır. O, ağzını tutur, gülməyini saxlamaq istəyir,
başını yellədir, gülüş bir anlıq sakitləşir, sonra daha da güclənir. Arturun
gözləri kədərlidir. Elə görünür ki, gülüş ona ağrı verir.
Sərnişinlər
Artura baxırlar. Balaca qız sanki yenidən ağlamaq istəyir.
ANA – Elə
bilirsiz, gülməlidir?
Artur
inkarla başını tərpədir, lakin gülməyini saxlaya bilmir. Cibindən balaca bir
kart çıxarıb qadına verir. Kartda yazılmışdır – “Bağışlayın ki, gülürəm. Arxada
daha çox məlumat var”.
Qadın
kartı çevirib bu sözləri görür: “Bu patologiyadır, əhvala uyğun olmayan kəskin
gülüşü yaradır. Bu hal müəyyən nevroloji pozuntularda, baş beynin travmalarında
yaranır”.
Qadın sona
qədər oxumur (lakin siz kadrı dayandırsanız, mətni oxuya bilərsiniz). O, əsəbi
halda başını yelləyir və kartı yerə atır.
Artur daha
yüksəkdən gülür. Onun üzündən göz yaşları axır. Özünə əlavə diqqət cəlb etməmək
üçün narıncı gödəkçənin papağını başına çəkir, ağzını nimdaş şərfi ilə örtür
ki, gülüş səsi azalsın.
Artur avtobusun
pəncərəsindən görünən şəhərə baxır...
5. Aşağı İst-Sayd, küçələr, Hotem – axşam.
Avtobus
uzaqlaşır. Günəş demək olar ki, batıb.
Artur
yavaş-yavaş zibillə dolu küçələrdən keçir. Səkilər zibil topaları ilə doludur,
hava tüstüdən qatılaşmışdır, ətraf yüngül duman içindədir. Küçələr yoxsullar,
qocalar və evsiz adamlarla doludur. Qadınlar sınıq arabalardakı uşaqlarıyla
keçib gedirlər; evsizlər metronun yerdəki barmaqlıqları üzərində yatırlar, küçələrdə
sahibsiz itlər dolaşır... Artur burada azsaylı ağdərililərdəndir.
Artur
ucqar bir aptekə gedir, aptekin arxasındakı tində iki əyyaş dalaşır, daha
doğrusu, biri digərini döyür. Artur hamı kimi onlara fikir vermir. Burada heç nə
heç kimin vecinə deyil.
6. Çoxmərtəbəli binanın vestibülü – axşam.
Nə vatxa
yaraşıqlı bir bina olmuş, indi isə zibilxanaya çevrilmiş binanın təmirsiz vestibülü.
Artur poçt qutusunu yoxlayır. Əlində,
içində dərman olan balaca ağ paket vardır. Poçt qutusu boşdur.
7. Həmin binanın lifti
Artur
çırıldayan liftə minir. İçəri alaqaranlıqdır, liftin divarları qraffiti ilə
doludur. Qapı bağlananda, səs eşidilir.
SOFİ –
Dayanın!!
Artur şəstlə
ayağını liftin qapısı arasına qoyur ki, qapı bağlanmasın... o, romantik ruhlu bir insandır.
Sofi Dümon
(20 yaşdan böyük), gözləri yorğundur, əlində ağır ərzaq torbaları vardır. O,
Cici, 5 yaşlı qızı ilə birgə liftə daxil olur.
SOFİ – Təşəkkür!
(izah edir) Sizə aiddir, çünki burada hər şey bərbaddır.
Artur
başını tərpədir “təşəkkür” və nəfəsini tutur ki, gülməsin.
O görür
ki, Cici liftin kirli tutacağını dili ilə yalayır.
SOFİ –
Ananız necədir?
Artur dərindən
nəfəs alır, Sofi ilə danışmaq rahat deyil. Artur dərmanlı ağ paketi qaldırıb
göstərir.
COKER – Hər
gün belədir. Əlimdən gələni edirəm ki, anamı sağaldım. Dərman almışam. Şam yeməyindən
sonra verəcəm.
SOFİ (nəzakətlə
gülümsəyir) – Onun bəxti gətirib ki, siz varsınız.
Artur minnətdarlıqla
gülümsəyir və yenidən Ciciyə baxır. Sofi nəhayət qızının nə etdiyini görür, onu
tutmaq istəyir, amma əlləri məşğuldur. Sofi qızını itələyir.
SOFİ –
Aman allah! Cici, etmə! Sənə neçə dəfə demişəm! (Artura) Bu bina necə də dəhşətlidir,
deyilmi?
Artur
başını tərpədir... bilmir nə desin, amma aydındır ki, Sofi ilə söhbətə davam
etmək istəyir. Qapılar açılır. Onlar liftdən çıxırlar.
SOFİ –
Ananıza salamımı yetirin!
Sofi və
Cici dəhlizlə əks istiqamətdə gedirlər. Artur bir müddət dayanıb qalır. Ürəyi sürətlə döyünür.
COKER (Sofinin arxasınca) – Ey, Sofi!
Sofi dönüb
baxır.
COKER –
Salamınızı anama çatdıraram.
Sofi
gülümsəyir, sanki “hə, hə, mən elə bunu dedim” demək istəyir.
8. Ananın mənzili – axşam.
Köhnə bir
mənzil, nimdaş xalça. İçəridə təzə bir şey yoxdur, lakin hər şey səliqəlidir.
Artur
qapını bağlayır və ona söykənir, donub qalır. Mırıltı eşidilir. Artur aşağı
baxır və qoca kürən pişiyi görür. Pişik Arturun ayaqlarına sürtünür.
ANA (kadr
arxasında) – Sevincim, poçtu yoxladın?
COKER - Hə, anacan, heç nə yoxdur.
ANA –
Yaxşı baxdın? Bəzən başın üstündə olmur.
Artur yenə
aşağı baxır və görür ki, pişik yoxdur.
COKER – Hə,
ana, yaxşı baxmışam. Başım da yerindədir. Şam yeməyi hazırlayacam, yaxşı?
Artur əlindəki
paketi açır və dərmanları masanın üzərinə tökür. Narıncı dərman qabları üzərində
yazılar görürük – “Artur Flek”, dərmanların adları: temazepam... perfenazin...
axenelzin... amiitriptilin... benzedrin... diazepam...meprobamat...
Artur bir
həb temazepam və bir həb meprobamat götürüb əzir və yeməyin üzərinə səpir.
Sonra digər dərman qablarından götürdüyü bir ovuc həbi udur. Aşağı baxır, kürən
pişiyi görüb gülümsəyir. Pişik aşağıdan yuxarı Artura baxır.
9. Ananın yataq otağı – gecə
Artur yeməyi
anasına gətirir. Penni (70 yaşlı) yataqdadır. Televizorda yerli xəbərlər göstərilir.
Artur yeməyi anasının qarşısına qoyur. Var gücü ilə bədən ağrısını büruzə verməməyə
çalışır, lakin ana onsuz da heç nə sezmir.
ANA – O, yəqin,
mənim məktublarımı almır.
Artur
yatağın yanındakı kürsüyə əyləşir.
COKER – O
məşğul insandır, anacan.
ANA – Mənim
üçün də məşğuldur? Onun ailəsində 12 il işləmişəm. Həmişə də mənə qarşı yaxşı
olub. Cavab yazmaq onun üçün ən asan işdir.
COKER –
Anacan, yeməyini ye. Sən yeməlisən.
ANA – Sənə
də yemək lazımdır. Gör, necə arıqsan...
Artur bir
söz deməyə macal tapmamış, anası barmağını televizora tərəf tuşlayır.
ANA – Gündən-günə
pis xəbərlərin sayı artır. Başqa bir şey yoxdu.
COKER – Bəlkə
televizora az baxasan?
ANA (fikir
vermədən) – O, Hotemin yeganə ümid yeridir. Əla mer olacaq. Elə deyirlər.
COKER (şən)
– Kim deyir? Kimlə danışmısan?
ANA – Xəbərlərdə
deyilir.
COKER – Bəsdi,
ana. O heç namizədliyini irəli sürmür. Mer olmaq Tomas Veynin nəyinə gərəkdir?
Biznesmen kimi daha çox fayda verər.
ANA – O, bu
şəhərin və hər bir sakinin qayğısını çəkir. Ona görə inana bilmirəm ki, mənə
cavab yazmır.
COKER –
Cavab verəcək. İndisə ye.
Artur
anasını yedizdirir.
COKER – Bu
gün özünü necə hiss edirsən?
ANA –
Bilmirəm. Görmürsən, gecələr daha pis oluram?
COKER
(anasına sataşır) - Bəlkə, Aya görədir.
Bəlkə, sən...qülyabanısan?
Artur
canavar kimi astadan ulayır. Ana gülür.
ANA – Heç
gülməli deyil.
Artur,
anasının necə yediyinə baxır.
ANA – Hər
halda bu gün ona yeni bir məktub yazdım. Daha yaxşısını. İstəyirəm ki, məktubu
düz ona çatdırasan.
COKER – Nə?
Niyə?
ANA – Ola
bilər ki, poçtalyon məktublarımı tullayır. Biz ona Milad bayramında çaypulu
verməliydik.
COKER –
Poçtalyona kim çaypulu verir ki?
ANA – Bəzi
insanlar. Varlı adamlar, misalçün.
Artur tabe
olaraq köks ötürür.
COKER –
Yaxşı. Sabah onun ofisinə zəng edərəm.
Artur anasının
yanında uzanır.
İri planda
televizor – “Mürrey Franklinin şousu”na giriş səslənir və diktor iştirak edən
ulduzların və Mürrey Franklinin adını çəkir.
DİKTOR (televizorda) – Bu, Mürrey Franklin ilə birbaşa yayımdır! Bu gün Mürreyin qonaqları kimdir? Sandra Vinger, yumorçu Skip Bayron və Yeldon & Chantel-in musiqiçiləri! Həmişə olduğu kimi, Don Ellis və onun caz orkestri! İndisə birbaşa – Mürrey Franklin!
Artur və anası şouya
baxırlar, bu onların ənənəsidir.
10.
Qonaq
otağı, ananın mənzili – gecə.
Gecədir. Ana bərk
yuxuya gedib. Artur qonaq otağında təkdir, bura onun yataq yeridir. Artur yata
bilmir. Köhnə bloknotunu açır. “Zarafatlar” səhifəsini tapir və yazmağa
başlayır…
İri plan: Arturun əli
asta-asta yazır: “Ruhi xəstəliklərdə ən ağır…”
Kamera Arturu göstərir
– o bir anlıq fikrə getmişdir. Sonra ağlına gələn fikirdən gülür.
Yenə iri plan sözlərə:
indi Artur sürətlə yazır – “….odur ki,
insanlar gözləyir ki, siz özünüzü elə aparacaqsınız ki, sanki onlar yoxdur”.
11.
Veyn
Qülləsi, küçə, Midtaun – səhər
Artur poladdan və
şüşədən tikilmiş qorxunc qülləyə baxır, onun fonunda Artur elə balaca görünür
ki… Arturun əlində anasının məktubu vardır. Girişdən şirkətin korporasiya
ştabına işçilər daxil olub-çıxırlar.
Artur nəhəng şüşə
qapılardan keçərək içəri daxil olur.
12.
Qəbul otağı, Veyn Enterprayzis, 25-ci mərtəbə
- səhər
Artur liftdən
çıxaraq qeydiyyatın ağ mərmər dayağına elə yaxınlaşır ki, sanki burada işləyir.
COKER – Salam.
Mister Tomas Veynə şəxsi məktub var.
KATİBƏ – Okey. Onu
mənə verin.
COKER – Çox vacib
məktubdur. Əmin olmalıyam ki, məktub ona çatacaq.
KATİBƏ – Ooo, onda
özünüz verin.
Artur kabinetə tərəf
gedir.
KATİBƏ – Zarafat
etdim. Məktubu burada qoyun.
COKER – Ooo,
yaxşı… bilirsiz, anam Veynin ailəsində 12 il işləyib. Onların evini idarə edib.
Bir neçə iş adamı
səbirsizliklə Arturun arxasında dayanıb gözləyirlər, onların görüşləri vardır.
KATİBƏ – Əla. Məktubu
mənə verin, başqa variant yoxdur. İndisə, zəhmət olmasa, kənara çəkilin.
COKER – Mister
Veyn anamı tanıyır. Bəlkə ona zəng edəsiniz? Deyin ki, buradayam.
KATİBƏ – Tomas
Veyn iş dalınca gedib.
Artur məyusdur.
COKER – Yaxşı. Heç
olmasa, sizin adınızı bilmək
olarmı?… Bilim ki, məktubu
kimə vermişəm.
Artur qəfildən qəbul
otağı ilə digər köməkçi ofislərin arasındakı şüşə arakəsmədən bir dəstə kişini
görür, Tomas Veyn (60 yaşlı) onların
arasındadır – gündən yanmış sifətli, boyalanmış qapqara saçlı.
COKER – Dayanın,
axı bu, odur (şüşə arakəsməyə yaxınlaşıb qışqırır) – Mister Veyn! Mister Veyn!
Artur şüşəni döyəcləyir.
Kişilər onu görmədən yola davam edirlər.
KATİBƏ – Ser,
xahiş edirəm, bəsdir. Ser!!
Artur şüşəni
vurmaqda davam edir.
13.
Veyn
qülləsi. Mərkəzi giriş – səhər.
Şüşə qapılar geniş
açılır, Arturu zorla küçəyə atırlar. Onun başı üstündə iki yekəpər mühafizəçi
dayanıb.
Anasının məktubu hələ
də Arturun əlindədir. O, özünü elə göstərir ki, çıxıb getməyə hazırdır, lakin
son anda yenidən qapıya tərəf qaçır. Mühafizəçilər onun qollarından bərk-bərk
tutub saxlayırlar.
14.
Ha-ha
ofisi, geyinmə otağı – günorta
İstedadların
sifarişi üzrə kiçik agentliyin darısqal geyinmə otağı. Artur agenlikdə işləyir.
Agentlik bayramlar və digər tədbirlər üçün klounları, fokusçuları, striptiz
qızlarını “icarəyə” verir.
Artur köynəyini
çıxaranda, ağrıdan üz-gözünü turşudur. Onun bədəni təpiklərdən gömgöydür.
RENDAL – Hər şey
qaydasındadır?
Artur çevrilib ona
baxır. Rendal (50 yaşlı) sanki hər şeyi bilən böyük ayıdır, yaxınlıqda dayanıb.
Rendal bayramlarda klounluq edir. Kloun geyiminin yarısı artıq onun əynindədir.
RENDAL – Eşitdim
ki, səni döyüblər. Lənətə gəlmiş vəhşilər.
COKER – Sadəcə bir
dəstə uşaq idi. Nahaq yerə onları təqib etdim, gərək vecimə almazdım.
Rendal öz şkafını
açır.
RENDAL – Bu nəsə
bir dəlilikdir. Onlara imkan versən, dünyanı dağıdarlar.
COKER (başını tərpədir)
– Anam deyir ki, bizim zəmanəmizdə insanlarda empatiya azdır.
RENDAL – Empatiya
nədir?
COKER – “başqa
insanların hisslərini anlamaq, həmhiss olmaq”
RENDAL – Simpatiya
kimi?
COKER – Yəqin…
amma bir az fərqli.
Rendal yaxınlaşır,
Artura qəhvəyi kağız zərf verir.
Artur zərfin içinə
baxır. Tapançadır… 38 kalibrli qısalüləli tapança. Artur karıxmış halda Rendala
baxır.
RENDAL – Götür. Mənim
bir neçə tapançam var. Sən gərək özünü müdafiə edəsən, dost. İndi psixlərin
sayı yaman artıb.
Artur ona baxır.
RENDAL (yavaş səslə)
– Bu 38-ci kalibrdir. Əgər nə vaxtsa ondan istifadə etmək lazım gəlsə, peşman
olmazsan. Onu vaxtında çıxartmaq kifayətdir.
COKER – Amma…. mənim
pulum… pulum yoxdur, Rendal.
RENDAL – Eybi yox,
boş ver. Sonra hesablaşarıq. Sən dostumsan axı.
Artur gülümsəyir.
RENDAL (gedərkən)
– Amma onu mən verməmişəm ha… Yaxşı?
Artur başını tərpədir.
Qəhvəyi kağız zərfi şkafına qoyur. Tələsmədən geyinməyə başlayır – gözü bir
çantaya sataşır. Harri (30 yaş),
çırtdanboy kloun pəncərədən başını geyinmə otağına salır.
HARRİ – Artur,
Hoyt səni kabinetinə çağırır.
COKER – Niyə?
HARRİ – Bilmirəm.
15.
Direksiya, Ha-ha istedad – günorta
Yarıgeyinmiş Artur
darısqal kabinetə daxil olur. Onun bossu Hoyt Von (60 yaşlı) metal masa arxasında
əyləşmişdir. Ofis tamam tör-töküntüdür, qəzetlər və qovluqlar masa üzərinə
dağılıb. Nəhəng külqabı siqaret kötüyü ilə doludur. Divarda tamam
yazılıb-pozulmuş bron təqvimi var.
COKER – Salam,
Hoyt. Harri dedi, məni görmək istəyirsən?
HOYT (gözlərini
qaldırmadan) – Karyeran necədir, hə? Artıq tanınmış stend-up komik olmusan?
COKER – Hələ yox.
Heç çıxış etməmişəm. Material üzərində işləyirəm.
Hoyt ona baxır,
siqaretini sümürür. Artur yaxınlaşıb əyləşmək istəyir.
HOYT – Yox,
oturma. Sözüm tez olacaq.
Artur yerində
donub qalır.
HOYT – Qulaq as,
Artur, xoşuma gəlirsən. Burdakı uşaqlar elə bilir ki, sən xəstəsən, amma mən səni bəyənirəm. Heç bilmirəm niyə… sən əcaibsən.
(pauza) Yəqin səbəb sənin gic gülməyindədir. Hər dəfə gülüşün məni dəli edir.
Öldürür…
Nə cavab verəcəyini
bilməyən Artur sadəcə başını tərpədir.
HOYT – Səndən yenə
şikayət var. Artıq bu, məni əsəbiləşdirir.
Artur dərindən nəfəs
alır, qaşını qaşıyır.
HOYT – Kenninin
musiqisi. Bazar günü. Oğlan dedi ki, sən yox oldun. Plakatı qaytarmamısan.
COKER – Mənə hücum
ediblər. Demişdim axı.
HOYT – Plakata görə?
Cəfəngiyyatdır. Bunda məna yoxdur… sadəcə plakatı qaytar. Oğlan biznesini
bağlayır.
Tak! Qəfildən
Artur başını divara çırpır.
HOYT (sarsılmış) –
Ey!
Tak! Tak! Artur
başını dəfələrlə divara çırpır, divarın suvağı qopub tökülür.
HOYT – Artur, bu nədi!
COKER (gərgin səslə)
– Plakat yoxdu.
Artur Hoyta baxır, üzündən qan süzülür.
Tərcümə: Sima
Hiç yorum yok:
Yorum Gönder