İri planda
iki həb görürük. Artur onları əzib yulaf sıyığının üstünə tökür.
ANA – Sevincim,
bura gəl! Tomas Veyni telefizorda göstərirlər.
Artur bir
neçə həb udur. Dərman qabının içinə baxır – boşdur. O döşəmədə əyləşmiş kürən
pişiyə nəzər salır. Pişik ucadan mırıldayır, Artur onu müşahidə edir.
ANA – Tez
ol! Gəl!
45.
Ananın yataq otağı, mənzil
Anasına
yemək gətirən Artur otağa daxil olur. Ana əlini yellədir ki, Artur yatağa əyləşsin.
ANA –
Ondan keçən həftə metroda baş vermiş qətllər haqqında soruşurlar.
COKER –
Niyə məhz ondan soruşurlar?
Ana
Arturun susmasına işarə edir. Artur onun yanında əyləşir və “Sabahın xeyir,
Hotem” televiziya şousuna tamaşa edir.
TOMAS VEYN
(TV ilə) - Dediyim kimi, Cerri, hər üç gənc
Wayne Investments-də işləyirdi, ən yaxşı mütəxəssislərdi. Yaxşı adam, gənc
insan idilər.
Arturun
üzündə kinayəli təbəssüm peyda olur – ekranda həmin üç gəncin fotoları nümayiş
etdirilir.
TOMAS VEYN
(TV ilə) – Mən onları şəxsən tanımasam da, bütün işçilər, indiki və keçmiş işçilərim
– hamı bir ailə kimidir.
Bu sözlərdən
Ana canlanır:
ANA –
Eşitdin? Deyirdim axı. Biz bir ailəyik.
İri planda
televizor: şəhərin qraffitiləri göstərilir. Mağaza vitrinlərində, reklam lövhələrində
varlıların öldürülməsinə çağırışlar var.
APARICI
(TV ilə) – Şəhərdə kütləvi etirazlar dalğası genişlənir. Və, deyəsən, az uğurlu
insanlar qatillərin tərəfindədirlər.
TOMAS VEYN
(TV ilə) – Bəli, bu utanc hissi verir. Bu səbəbə görə mən şəhərin merliyinə
namizədliyimi irəli sürərdim. Hotem şəhəri yolunu azıb.
APARICI
(TV ilə) – Siz namizədliyinizi irəli sürəcəksiniz?
TOMAS VEYN
(TV ilə) (gülümsəyərək) – Şərh yoxdur...
Arturun
anası həyəcanla ah çəkir.
APARICI
(TV ilə) – Şahid iddia edir ki, qatil kloun maskasında və ya kloun qrimində idi
– bu haqda fikriniz?
Artur irəli
əyilib, maraqla dinləyir.
TOMAS VEYN
(TV ilə) – Mənə aydındır ki, ancaq qorxaq adam belə bir soyuqqanlılıqla qətli
törədə bilər! Maska arxasında gizlənən adam kimdirsə, daha uğurlu insanlara
paxıllıq edir, və qorxaq olduğu üçün əsil simasını gizlədir. (Kameraya) Və nə qədər
ki, bu paxıllıq bitməyəcək, həyatda uğur qazanmış bizlər, uğursuzlara həmişə
kloun kimi baxacayıq.
46.
Komedi-klub, kulisarxası dəhliz
– axşam.
Kamera dəhliz
ilə asta-asta yeriyən Arturu izləyir.
Pərdə
endirilmişdir və projektorların işığı pərdə üstündə qan kimi qırmızı rəngdə
görünür.
Digər
komik aktyorlar Artur onların yanından keçəndə, ona baxırlar.
İri planda
Artur – digərlərinə gərginliklə baxır, tər muncuq kimi onun alnından üzüaşağı
süzülür.
Artur pərdəyə,
işığa yaxınlaşır, arxa cibindən köhnəlmiş bloknotunu çıxarır. Zala baxanda
xeyli insan görür. Görür ki, Sofi kürsüyə əyləşir.
Qaranlıq dəhlizə
qayıdan Artur nəfəsini dərir. Səhnədən aparıcının səsi eşidilir.
APARICI
(kadr arxasından) – Növbəti komik aktyor özünü Hotemin yerli sakini kimi təsvir
edir. Uşaqlıqdan ona deyiblər ki, onun həyatda məqsədi “bu soyuq qaranlıq
dünyaya sevinc və gülüş gətirməkdir”.... Hmmm... Hə, yaxşı.
Artur
adamların gülüşünü eşidir.
APARICI
(kadr arxasında) – Gəlin, Artur Fleki
salamlayaq!!
Bir neçə
alqış səsi eşidilir.
Artur səhnəyə,
projektorların altına çıxır, mikrofonu düzəldir, işıq elə parlaqdır ki, Artur
qaranlıq auditoriyada heç kimi görmür, onun əlləri titrəyir. Köhnəlmiş bloknotu
əlində tutan Artur dərindən nəfəs alır, qaranlığa baxır, ağzını açır ki,
salamlaşsın...
Və... gülməyə
başlayır. Onun gözləri geniş açılır. Aman allah, yox, indi yox... Arturun üzündə
qorxu ifadəsi var, o gülməkdə davam edir. Camaat ona baxır.
Nəhayət,
Artur özünü ələ alır.
COKER –
(gülməyini saxlamağa çalışaraq) – Axşamınız xeyir... Salam (dərin nəfəs) Burada
olmaq çox xoşdur (gülür) Uşaqlıqda mən məktəbə nifrət edirdim. Anam həmişə
deyirdi ki (anasının səsini yamsılayır, gülə-gülə) Məktəbdən həzz al. Axı gələcəkdə
sən işləməli olacaqsan (gülür) – İşləməyəcəm, anacan. Mən komik aktyor olacam!
Zalda ölü
sakitlik var. Təkcə Artur gülməkdə davam edir...
47.
Komedi-Klub, küçə - gecə.
Artur və
Sofi çıxışdan sonra, izdihamı yararaq, klubdan çıxırlar. Heç kim Artura tərəf
baxmır, heç kim heç nə demir. Bəlkə, bir ya iki nəfər onun arxasınca gülür.
Zibil
torbaları parlaq lövhələrlə dolu dar küçəni daha da darlaşdırmışdır.
Artur və
Sofi dinməz halda gedirlər. Xəcalətli susqunluq.
COKER – Sən
gülürdünmü? Səhnədən görmürdüm.
Sofi
bilmir nə desin, susur. Siqaret yandırıb çəkir.
SOFİ (xətrə
dəyməmək üçün) – Əlbəttə! Hə... Eşitmirdin?
COKER – Mən
yalnız öz ürəyimin döyüntüsünü eşidirdim...
SOFİ – Əla
idi. Mənə evdən çıxmaq lazım idi... Odur ki, minnətdaram... Bəs qalan
dostlarına nə oldu?
COKER –
Hansı dostlarıma?
SOFİ – Deməmişdin
ki, dostların da gələcək?
COKER
(dediyini unudub, bəraət qazanmaq istəyir) – Hə, onları dəvət etmək fikrindən
keçdim. Artist istəyir ki, əsil tamaşaçının reaksiyasını görsün, məni sevməyən,
tanımayan insanların... anlayırsan?
SOFİ
(başını tərpədərək) – Hə. Anlayıram.
Artur
gülümsəyir, ünsiyyətə sevinir. Onlar qəzet köşkünün yanından keçirlər. Stenddə
Çin qəzetləri ilə yanaşı üç adamın qətli haqqında başlıqlarla dolu yerli qəzetlər
var.
Artur
dayanır, başlıqlara baxır.
İri plan –
başlıqlar: “Metroda linç edən adam”... “Qatil Kloun azadlıqda?”...
SOFİ
(başlıqları göstərərək) – Bu zibilə inanırsan?
COKER – Hə...
Təsəvvür etmirəm, bu hadisə necə baş verə bilər...
SOFİ – Beş
dollara mərc gəlirəm ki, o varlı gədələr buna layiqdirlər.
Artur
Sofiyə tərəf dönür.
COKER – Elə
düşünürsən?
SOFİ – Bir
onların sifətlərinə bax. Gör necə özündən razıdırlar... Mən bu baxışları görmüşəm.
Cəhənnəm olsunlar!
Sofi çırtma
ilə siqareti kənara atır və irəli gedir.
SOFİ –
Onları öldürmüş adam qəhrəmandır. İndi
Hotemdə əclafların sayı üç nəfər azalıb. Milyonu qalıb.
Artur bir
müddət onun yerişini müşahidə edir.
COKER
(Sofinin arxasınca) – Ey, qəhvə istəyirsən?
SOFİ geri
çevrilib gülümsəyir. Küçədəki zibil yığını arasında o, gözəl görünür.
Onların
yanından təcili yardım maşını ötüb keçir, uca siqnal səsi eşidilir. Sofi nəsə
deyir, Artur eşitmir. Sofi yoluna davam edir.
Artur onun
arxasınca qaçır, ayağı zibil qutusunun tənəkə qapağına ilişir.
Cəng...cəng...
Artur üzüüstə yıxılır.
Sofi geriyə
boylanır, gülməyə başlayır. Artura kömək edə bilmir, amma gülüşünü də saxlamır.
Axşam ərzində ilk dəfədir ki, gülür.
48. “Tuz” Çin restoranı, masa – gecə
Masanın üzərində
yarımçıq çin yeməkli boşqablar var. Artur və Sofi qarşı-qarşıya əyləşiblər,
söhbət edirlər.
Zal
doludur, parlaq işıqlanır, daha çox kazinoya bənzəyir. Əksəriyyət çinlilərdir.
Çox səs-küy var.
SOFİ –
Deyirəm sənə, idarə yolun o tərəfindədir. Vol-Strit, banklar, siyasətçilər.
Onların hamısını öldürmək lazımdır. Hamısı cəhənnəm olsun!
Artur onun
sözlərindən fikrə gedir.
COKER –
Bilmirəm.
SOFİ – Nəyi
bilmirsən?
COKER –
Axı onların hamısı pis deyil. Məsələn, Tomas Veyni götürək, o qəhrəmandır...
SOFİ – Yox
a... O hamıdan pisdir!
Artur
karıxır.
COKER –
Sofi, o yeganə adamdır ki, bu şəhəri xilas edə bilər.
SOFİ –
Zarafat edirsən? O özünə vurğundur. Var-dövləti ilə öyünür. Halbuki bizim əksərimiz
ev pulunu ödəyə bilmirik, uşaqlarımız ac qalır.
Artur
başını tərpədir. Fikrə gedir.
COKER – Nə
olub ki?
SOFİ – Nəyi
deyirsən?
COKER – Sənin
işin... bankda...
SOFİ – Hə...
Mən ... mmmm....
ARTUR – Yəqin,
bu haqda danışmaq olmaz.
SOFİ – Səni
nə vaxtsa işdən qovublar?
Artur ani
fikrə gedir.
COKER – Hər
dəfə...
SOFİ - Nə
vaxtsa həmin yeri yandırmaq istəmisən?
COKER
(fikirli) – Hər dəfə.
SOFİ gülümsəyir.
SOFİ – Hə...
Ora son illərdə mənim ilk yaxşı iş yerim idi, xoşuma gəlirdi. Səviyyəli işdi,
ofisiant-filan deyildi. Saat doqquzdan beşə qədər işləyirdim, güzəştlər vardı.
Uşağı olan qadın üçün bilirsən də bu nə deməkdir?
Artur sadəcə
ona baxır, bilmir bu nə deməkdir. Sadəcə gülümsəyir.
SOFİ –
Ancaq ilk gündən menecer üzümə gülümsəməyə başladı, daim qulağıma nəsə
pıçıldayırdı, mənə toxunurdu... istəyirdi məni məcbur etsin ki, onunla yatım...
COKER
(sözü kəsir) – Sən bunu etdin? Yatdın onunla?
SOFİ – Nə?
Yooooox. Bu adam eşşəyin biridir. Axırda ondan bossa şikayət etdim, məni işdən
çıxartdılar. İndisə... bilmirəm nə edim...
COKER –
Düz etmisən. Dayan, nəyi deyirsən?
SOFİ – Hər
şey yaxşı idi...Sanki gələcəyim vardı. Məqsədim... İndisə bilmirəm evin pulunu
necə ödəyəcəm.
Artur gülməyə
başlayır. Əli ilə ağzını tutur, gülməyini gizlətmək istəyir, amma gülüşünü
saxlaya bilmir.
Sofi
narahatdır. Kafedəki adamlar, qırmızı jiletli ofisiantlar, ofisiantların köməkçiləri
– hamı çevrilib Artura baxır. Bəziləri ona gülür. Artur xəcalətlə üzünü pəncərəyə
çevirir, öz əksini şüşədə görür, gülməkdən üzü qızarıb.
Artur pəncərədən,
küçədən keçən bir dəstə hay-küylü yeniyetməni görür, onlardan biri tini dönərkən,
çevrilib baxır.
Həmin
uşağın üzündə kloun maskası var, Arturun kloun qriminə oxşayır. Uşaqlar gözdən
itir. Artur gözlərinə inanmır.
Hələ də
gülərək, Artur Sofiyə tərəf çevrilir, sadəcə gözləyir ki, gülüş bitsin. Nəhayət,
gülüş biitdikdə,
ARTUR (nəfəsini
dərərək) – Bağışla... Bu xəstəlikdəndir...
SOFİ –
Bilirəm.
Pauza.
SOFİ – Bu
gülmək necə yaranıb?
COKER –
Bilmirəm. Oxumuşam ki, insanlar kəllə-beyin zədəsi və ya başın zədələnməsi
zamanı bu halı yaşayırlar. Anam dedyib ki, belə doğulmuşam. Gülmək üçün
doğulmuşam...
SOFİ – Ona
görə anan sənə “Sevincim” deyir?
COKER – Yəqin...
Bu hal mən uşaq olanda başlayıb. Uşaqlar mənə gülürdülər, məni sevincli
adlandırırdılar, pis mənada... Bir dəfə bezdim.. 10 yaşım olanda mən... mən...
(gülümsəyir)
SOFİ – Nə?
COKER –
Ülgüclə üzümdə təbəssüm kəsdim (çapıqları göstərəndə Sofi sarsılır) Yəni
“Sevinc istəyirsiz? Bu da sizə sevinc!”
Artur
aşağı baxır, gülümsəməkdə davam edir. Sofi onu müşahidə edir.
SOFİ –
Özünü necə hiss edirsən?
COKER –
Ömrüm boyu bu haqda düşünürəm...
Onlar sakitcə
əyləşiblər. Səssizlikdir.
49.
Ananın mənzili, qonaq otağı –
axşam
Artur
anasının mənzilinə qapını açır, əlində restoran yeməyinin qalıqları olan paket
var. O, qonaq otağında televizorun sayrışan mavi işığını görür, Mürrey
Franklinin şousunun son sədalarını eşidir.
Artur
qapını kilidləyir, yüksəklidə yerləşən qapı zəncirini bağlayır. Qaranlıq qonaq
otağında yatan anasını görmək üçün dönüb baxır, pişik ananın yanındakı kürsüdə
atılıb-düşür.
Artur,
Mürreyin illərlə təkrar etdiyi xarakterik jesti müşahidə edir.
M.FRANKLİN
(TV ilə) – kameraya baxaraq – Gecəniz xeyrə! Və yadda saxlayın – həyat belədir.
COKER (sakitcə) – həyat belədir...
Artur, Don
Ellis və onun caz orkestrinin çaldığı final melodiyanı dinləyir (Frenk
Sinatranın “That,s life” mahnısının instrumental variantı səslənir).
Musiqi sədaları
altında Artur anasına tərəf əyilir ki, onun nəfəs alıb-almadığını yoxlasın. O,
ananın nəfəsini yanağında hiss edir. Anasını qolları arasına alıb, rəqs edirmiş
kimi, onu yatağına aparır.
Artur
otaqdan çıxanda... biz arxada qalırıq.
Televizordan
hələ də musiqi səslənir. Artur qonaq otağına qayıdıb televizoru söndürür. Gödəkçəsini
çıxarıb divanın üzərinə atır. Görür ki, gödəkçənin cibində nəsə var. Artur o nəsəni
çıxarır. Bu, Tomas Veynə verməli olduğu zərfdir.
Artur bir
müddət zərfə baxır, sonra ehtiyatla onu açıb məktubu oxuyur:
İri planda
sözlər: “Əziz Tomas, bilmirəm daha hara müraciət edim...
Mənə sənin
köməyin lazımdır...
Sənin
oğlun var... bizim oğlumuz... Onun adı Arturdur”.
Artur
oxumağı dayandırır və təkrar edir:
-
Sənin
oğlun var...
Artur dönə-dönə bu sözləri oxuyur – Sənin oğlun var...
Çevirdi: Sima
Hiç yorum yok:
Yorum Gönder