Ertəsi gün sinfə gəldikdə, bir neçə oğlan fit çaldı,
qızlar da lövhəyə baxıb gülürdülər. Lövhədə təbaşirlə ürək şəkli çəkilmişdi,
içində mənim və Süyanın adı yazılmışdı. Gözlərimi endirib sakitcə yerimə
keçdim. Partamın üstündə də markerlə ürək şəkli çəkilmişdi.
-
Sabahın
xeyir, Midzuho! – Ayako əlindəki telefonu yellədərək, qışqırdı. Ona fikir vermədən
əyləşib kitabı açdım, oxumağa başladım.
Süya peyda olanda, onu da gülüşlə qarşıladılar. O,
lövhəyə qısa nəzər salıb çantasını partaya qoydu və hamıdan bərk fit çalan
Takaxiroya yaxınlaşdı.
- - Nədi,
qatil, deməyə nə sözün var? – Takaxiro saymazyana gülümsəyərək soruşdu.
Süya cavab vermədi. Əlini uzadıb dırnağının ucu ilə
Taxakironun üzündə bir cızıq açdı, bu qırmızı xətt bütün işgəncələrə son qoydu.
Cızıq Süyanın qanı ilə çəkilmişdi. Oğlanlardan bir neçəsi qışqırdı, sonra
sakitlik çökdü.
-
Midzukini
tutan sən idin? Onun qarşısında yaltaqlanırdın? – Süya Ayakonu göstərdi. Sonra
o, Ayakoya yaxınlaşıb yaralı barmağını yuxarı qaldırdı. Qan onun biləyinə qədər
axmışdı. Ayako qorxub əlləri ilə üzünü qapadı, amma Süya qanlı əlini onun parta
üzərindəki telefonuna toxundurdu. Ayako qışqırdı.
-
Qorxaq!
- Süya dedi. – Özün çirkli işləri görmürsən, başqalarına etdirirsən? O qədər
avamsan ki, anlamırsan ki, səndən sui-istifadə edirlər?
Sonra Süya Yusukenin partasına yaxınlaşdı. Yusuke
baş verənləri səssizcə izləyirdi.
- - Sən
də bu gic qızı mənə yönəltdin, cırnatdın onu? – Süya soruşdu.
Bu sözlərdən sonra Süya əyilib Yusukenin
dodaqlarından öpdü. Bütün sinif nəfəsini qısdı. Yusuke, idmançı oğlan, birdən-birə
ağardı.
-
Nədi,
xoşuna gəldi? – Süya təbəssümlə dedi. – Cəza vermək? Siz ədalət qurumu
deyilsiniz! Bilirdiniz ki, Moriqutinin qızı hovuza tərəf gedib. Vaxtında hər
şeyi danışsaydınız, qız tələf olmazdı! Hamınız günahkarsız! Elə bilirsiniz, məni
cəzalandırmaqla günahlarınızı yuyursunuz? Nə oldu? Siz əsil riyakarsınız! Əgər
bu şəkildə davam etsəniz, gələn dəfə hər birinizi, dilimi ağzınıza salaraq, öpəcəm!
O vaxtdan Süyadan hamı əl çəkdi.
***
Süya ilə hər gün köhnə evdə görüşürdük. Valideynlərimə
deyirdim ki, rəfiqələrimlə dərs oxuyuram, mən yaxşı şagird olduğuma görə, evə
gec gəlsəm də, məni danlamırdılar. Süyanın atası yenidən evlənmişdi, evdə daha
bir uşaq vardı, Süya dərslərini nənəsinin evində edirdi, valideynlərinin heç nə vecinə deyildi, onlar Süyanın həftələrlə
evə gəlmədiyini duymurdular.
Evin dərinliyində laboratoriya yerləşirdi. Süya dərsləri
ilə maraqlanmırdı, əvəzində qol saatını xatırladan yeni ixtirası ilə məşğul
idi. Nə qədər desəm də, ixtirası haqqında mənə heç nə söyləmirdi. Mən uzaqdan
Süyanı iş başında müşahidə etməyi sevirdim. İyul ayının ortalarında Süya işini bitirdi və sirrini açdı. Süya “yalan detektorunu” ixtira etmişdi. O izah
etdi ki, qurğunun kəmərinə bərkidilmiş cihaz insanın nəbzindəki dəyişikləri
duyur. Bu zaman lampa yanır və səs eşidilir.
- - Gəl
baxaq.
Saatı qoluma taxdım, bir an düşündüm ki, məni cərəyan
vurarmı?
- - Cərəyan
vurmasından qorxursan? – Süya soruşdu.
- - Yox,
qorxmuram.
Bipp... bipp... detektorun siferblatı işıqlandı, zəngli
saata oxşayırdı.
- - Əla!
İşləyir!
-
Əla!
– təkrar etdim. Həqiqətən, bu ixtira məni valeh etmişdi. Süya bir az çəkingən
kimi oldu. Gülümsəyib, qolumdan tutdu və özünə sıxdı.
- - Həmişə
istəmişəm ki, məni görsünlər, dəyər versinlər... O vaxt da bunu istəyirdim...
Deyəsən, Süya Manamidən danışırdı. İlk dəfə idi ki,
o hadisəni dilə gətirirdi. Mən əlimi onun əlinin üzərinə qoydum.
-
Bilirsən,
balaca uşaqlar həmişə ala-yarımçıq danışırlar. Böyüklər nə istədiklərini
soruşana qədər. Bir dəfə ölü pişik
tapmışdım. Ooo..., əslində, onu mən
öldürmüşdüm. Ooo, ola bilməz...
Zarafat etmirəm, it-pişiyi öldürürdüm. Doğrudan?
Sadəcə öldürmürəm. Bəs necə? “Ölüm
maşını” ilə öldürürəm. Əcəb işdir! Müəllim,
içində sürpriz var, açın. Midzuki, günahım nədir? Qatiləm? Mənə nə edəcəklər?
Süya ağlayırdı. Bilmirdim, nə deyim. Onu bərk-bərk
qucaqladım. Qolumdakı detektor səs etməyə başladı, başqa səbəbə görə...
Evə ancaq səhərçağı qayıtdım.
***
Süyanı rahat buraxdıqlarına görə ən çox sevinən Verter
oldu. Süyanın üzündə yenidən təbəssüm vardı, onun yekun testi sinifdə ən yüksək
bal toplamışdı. O zamana qədər hamı elə bilirdi ki, sinif nümayəndəsi Yusuke
olacaq, amma artıq bəzi uşaqlar səslərini Süyaya vermək haqqında düşünürdülər.
Sinifdəki ab-havanı duymayan Verter çox coşqulu idi. Hətta bir dəfə Verter
Süyaya göz vurdu, Süya ingilis dili müəllimi ilə söhbət edirdi. Bunu görcək, ürəyim
bulandı.
Verterin həll edə bilmədiyi bir problem qalmışdı – Naoki. Əgər Naoki məktəbə
gəlməsə, sinifdə qalacaqdı.
Moriquti-sensey, nəyisə bacarmadığını etiraf etmək,
sizcə, çox mühümdürmü? Bilirəm, siz bizi təslim olmamağa öyrədirdiniz, amma düşünürəm
ki, bəzən özündə bir cəsarət duyub zəifliyini etiraf etməlisən. Verter Naokini
məktəbə gətizdirmək fikrindən gərək vaz keçəydi. Bu halı daha təcrübəli müəllimlərlə
müzakirə etməliydi. Bəlkə də, təklif etməliydi ki, Naokini başqa sinfə
keçirsinlər, ya nəsə başqa bir çıxış yolu olmalıydı...
Naokinin məktəbə gəlməməyinin səbəbi köhnə sinfində
qalacaqdı.
Çevirdi: Sima Ənnağı
Hiç yorum yok:
Yorum Gönder