Çağdaş Azərbaycan poeziyası. Sevinc Elsevər

 

Uşaqlar ilk qara sevinən kimi

İlk qar dənələri torpağa qonur,

əriyirlər,

hələ bilmirsən

qalacaq yerdə qar,

ya əriyəcək zərrəciklər,

yox olacaqlar?!

 

Zamanla

Bəzən bütöv gecədən sonra

Durub pəncərədən baxanda

əmin olursan hər yerin ağappaqlığına.

Sevinirsən qar yağmağına.

Gözlədiyin mənzərəylə rastlaşmayanda

Təəssüflənir,

Kədərlənirsən.

 

Bütün yaxşı əməlləri görən

Cəsur adamlar da

Ilk qar dənəcikləri kimi

Atılırlar irəli,

Hələ əmin olmadan

Nəyin, necə olacağına,

Xeyirxahlıqlarının yadda qalıb –

Qalmayacağına,

Fədakarlığa dəyib-dəyməyəcəyinə.

Bütün hallarda hər şey ötəridir,

Amma həm də unudulmaz,

Xatırlanmağa dəyər işlər görməli.

Uşaqlar hər sabah pəncərədən

Qar görüb sevinən kimi,

Sevinməli sənin əməllərinə adamlar.

*

Buzxanadan  çıxardığım

Iki xırda balıq

Bir-birinə elə sarılıb ki!

Bir-birindən ayrılmaları üçün

Suya salıram

Və düşünürəm kədərlə,

Sanki həyatın amansızlığına,

Mənim qəddarlığıma qarşı birləşiblər əbədi.

*

Dünən dibçəyə əkdiyim budaq

Dirçəlib,

Ona mən də həyat vermişəm

Su,

Hava,

Torpaq,

Günəş kimi

Sığmır sevincim yerə-göyə,

Ana olacağam mən də bu çiçəyə...

Çağdaş Azərbaycan poeziyası. Həmid Herişçi

 

“Magie Noire” – gecə sevdası

Gözlərim ulduz istəyir...

Üfüqlərdə itib əriyən bir qız istəyir.

Telefonum tam yeni blutuz istəyir

Musiqimi

Sənə çatdırmağa.

Dadsızdı sənsiz çayım,

Adsızdı ünvanım.

FM radiolardakı qısa  dalğalarım

Bir rep nəğməmi ele hey təkrarlayır:

“Bilirsənmi, bu kəlağayının neçə yaşı var?”

Min bir gecə yaşı var...

Canında nə qədər göz yaşı var?

Bu gözəlin yeddi qardaşı var...

Biri mütləq bıçaqlayacaq səni...

Bu kinoteatrın gecə seansı var,

Öz xilasedici ağ ambulansı var,

Bütün qəzalardan səni qurtarmaq şansı var.

Səmimi ol...

Təkcə bu qızı sevmə...

Gecəylə qoşa sev bu gözəli –

“Magie Noire” ətrini.

*

O qadını hələ sevməyibsən

Dikdaban çəkmələrin səsi gəlir

Gecədən.

O qadını hələ sevməyibsən.

Kölgəsi ötür üzərindən,

Küçəndən,

Əli sallanır kürəyindən.

Avtomobilinin bahalı nömrəsindən

Yaz damır,

Təkcə sənə miras qalır,

Budaqlarında bircə gilas qalır

Xatırlamağa.

Az qalır görüşünüzə.

O qadını sevməyibsən.

Bardakı

Mikrodalğalı soba siqnal verir,

Final verir,

Sual verir lal sevginizə.

Hər ikinizə.

Bu qanlı kimano xələtin

Çoxdan ağırlıq edir

Incə kürəklərinə.

Hələ var

O qadını sevəcəyin günə.

İnşallah, gələcəkdə.

Şeir dəftərçəmdən. Darıxıram təbəssümlü, xoşbəxt çöhrələr üçün

 

Darıxıram təbəssümlü, xoşbəxt çöhrələr üçün.

Gəzirəm arzuların nəğməsiylə dolmuş küçələri,

Yığıram ovcuma sevinc zərrələrini,

İstəyirəm rədd olsun yalan vədlər –

Guya sabah hər şey yaxşı olacaq!

Onsuz da ürək ritmi səngiyir bəzən,

Onsuz da kədər sancır beynimi.

Onsuz da duyğular qarışıb dolaşır,

Çaşdırır fikir kələfini.

Amma bilirəm ki,

Möcüzə olacaq –

Bir gün fikirlər nizamla sıra alacaq,

Bir gün beynimə sevinc qonacaq,

Yollayacaq impulsları ürəyimə -

Sabah hər şey yaxşı olacaq!

Sima

Alov İnannanın şeirlərindən

 

Yorulanda çadırlandığım,
İslananda çətirləndiyim ,
İstilənəndə kölgələndiyim,
Quşlarının nəğmələriylə
Ruhumu qanadlandırdığım,
Ağac anam,
Gəl, səni qucaqlayım.
Qollarım qollarına çatmasa da olar,
Saçlarım saçlarına dolaşmasa da olar,
Nəfəsinlə ciyərlərimi doldurum.
Ruhunu içimə çəkim.
Sənə söykənəndə,
Arxamda güvənlə durduğunu
bilməyim bəsimdi

Sevinc Elsevərdən bir şeir. Qarışqalar

 

Kədərli evlərə

hücum çəkər qarışqalar,

kədərli və yoxsul evləri işğal edərlər.

Kədərli uşaqların şəkərlərinə daraşarlar

tənha və yorğun qocaların

sandığına doluşarlar.

Xəstələrin yuxusuna

unudulmuş ölülərin,

qəriblərin məzarına

yığışarlar.

Şirini sevməkləri yalandır

dərdi, acını axtarıb taparlar hər yerdə qarışqalar...

Şeir dəftərçəmdən. Yağışlı bir gündə

 

Yağışlı bir gündə

Səma boz,

Şəhər boş,

Yeraltı keçid - alaqaranlıq.

Düşdüm pillələri

Yorğun addımlarla,

Üzümə çırpılmış damlalarla.

 

Keçiddə burulan mülayim külək

Bədənimə sarılır.

Akkordeon minorla ağlayır –

Vals keçiddə fırlanır,

Yeraltından keçən tək-tük adamlar

Valsin həzin notları altında  

Biganəli addımlayır.

 

Solğun bənizli,

Tutqungözlü  

Cavan oğlan nimdaş dizlərindəki

Köhnə akkordeonu sinəsinə sıxıb

Vals çalır,

La-lalala-lala-la...

Miskin həyatına etiraz edərək

Notlarda xəyallarını canlandırır... 

La-lalala-lala-la...

Sima, 2022

Çağdaş Azərbaycan poeziyası. Cəlil Cavanşir. Məni ağlatmaq asandır.

 

Məni ağlatmaq asandır;

Bir gülüş, Bir öpüş, Ya da süzgün gözlərlə baxıb, "Sən yaxşı insansan" deməyin. Bir də dəniz qədər dərin gözlərində Oxuduğum sevgi. Yandırar... Yandırar... yaxar.... Bu gözəlliklər ki, var, Aldadar məni gülüm, aldadar... Məni ağlatmaq asandır; Buludlu havalar, Həzin bir musiqi, Gözlədiyim bir telefon zəngi, Alar məni özümdən, Uzaqlara uçurar. Gecənin gec saatlarında Dinlədiyim bütün mahnılar, Ağladar məni gülüm, ağladar... Məni ovutmaq asandır; Əllərimi tutub, Gözlərimə baxıb, Dağılmış saçlarıma Çəkdiyin tumar... Və ya titrəyən səsinlə Telefonun o başından "Səni çox istəyirəm" deməyin... Səsindəki həzinlik, Gözlərindəki xumar Ovudar məni gülüm, ovudar...

Çağdaş poeziyadan. Sevinc Elsevər.

 ***

Nə gözəl payız dəyib ağaca

bir yaşıl yarpağı da qalmayıb,

saralmış bir yarpağını da yerə salmayıb...

***

Soyuqdur,

hər yan bombozdur.

Qarğalar ağaclardan düşür

iri yarpaqlar kimi,

yerə qonur,

qarıldayır, uçuşurlar ümidsizcə.

Uşaq baxır və deyir:

"Yazıq qarğalar ağlayırlar"...

Qarğaların kədərini hiss edirmi

böyüklər də belə?

Qaynaq: "Ədəbiyyat qəzeti", 11.12.2021.

Çağdaş poeziyadan. Xanım Aydın.

 Bilirsən...

*

Bilirsən, çox güclüyəm,

Sinəmdə düyünlənən,

Hayqırtımdan yaranıb

Qayalaşmış daş kimi...

Bilmirsən, çox zəifəm

Qaranlıq gecələrdə

Ağrılarımdan qopub

Gözlərimdən süzülüb

Gilənənən yaş kimi...

Bilirsən...

Yaxşı ki...

*

Yaxşı ki, xəyallarımız var

Axıb gedən acı ömrü

Hiss etmirik, baş qatırıq...

Yaxşı ki, duyğularımız var

Gerçəklərin ağrı günü

Özümüzə qapılırıq...

Yaxşı ki, suallarımız var

Cavabsız havada qalan

Onlara min don bəzəyib

Yaşayırıq, aldanaraq...

 Qaynaq: "Ədəbiyyat qəzeti", 11.12.2021

Şeir dəftərçəmdən. Qarabağın uşaqları

 

Dağılmış ocaqda uşaq səsləri.

Bomba zərbələrindən

Torpaq titrəyir,

İnləyir,

Üsyan edir düşmənə.

Hər tərəf tüstü,

Ölüm gəzir saymazyana.

Uşaqlar

Babaların əkdiyi

Ağaclara sığınır,

Gizlənir güllələrdən.

Budaqlarda qızaran narların

Bağrı yarılmış,

Dişlərini qıcayır düşmənə.

Rədd ol!

Rədd ol bu torpaqdan!

İnsan karvanı dağları aşır,

Dağılmış yurddan məcburən qaçır.

Qucaqda ağlayan çağaların səsi

Ataların ürəyini dağıdır –

Hər yer və hər kəs

“Biz qayidacağıq, torpaq!!” – pıçıldayır...

2010

Şəms Eldən 3 şeir

Biz
sözlәrdәn imtina etdik
gözlәrin sehrinә düşdük
qazandıq bir-birimizi..
Vә yenә biz
gözlәrimizi yumduq
sözlәrin arxasında gizlәndik
itirdik bir-birimizi...

Bilmәdik gün gәlәcәk
gözlәrә hәsrәt qalacaq
sözlәrә
nifrәtlә qulaq asacağıq
gәlәcәkdәn ümidsiz
keçmişdә ilişib qalacağıq.

**

Bir ürək ki..

Bir ürək ki,
içinə heç kimin
nə qəlbinə, nə ağlına
nə də həyatına sığmayan
sən sığmısan..
Bir ürək ki,
nə sənin
nə də başqa kimsənin
ürəyinə, həyatına
sığmayacaq.
Bu məndəki
daşıması günü gündən
daha çətin, daha ağır
elə dəli bir ürək ki!

**

Həyatdır da,

birdən ölüb eləsəm
bütün ağrı-acılardan
ətrafdakı yalanlardan
dünyanın ən rahat yeri
anamın diz ucundan
və qızımdan
qaçıb getsəm,

hamıdan çox sevinən
saatlar olacaq

qaçdı-tutdu oynamayacam onlarla
dayanacaqlar
nəfəs alacaqlar
yaşayacaqlar...

http://gunesvadisi.blogspot.com/

Xuraman Hüseynzadə. Dekabr ayı

Yeni fəsil gəlib

Yeni ay

Və yepyeni gün...

Təkcə günəş köhnədir.

Bizim evdə saat yatır

Təqvim dünəni göstərir

Divar kağızımız köhnə...

Günəşin istisi keçmiş şüalarını

Silirəm pəncərədən

Hava boz üzünü göstərir...

Divar kağızlarının solğun bənizinə

Baxaraq anlayıram:

Bu dünyada

Köhnə tarixli təqvim

Və yatmış saat qədər

Kədərli heç nə yoxdu...

"Qadın yazarlar" silsiləsindən. Cahan Gülsündən 2 şeir.

***


 Nədir bu susqunluğun?

Niyə danışmırsan, ruhum?!

Mənim bitməyən yorğunluğum

Sənin bitməyən qorxun...

Elə istəyirəm ki, günəşi aparsınlar gecələrdən

Yolları yığışdırsınlar küçələrdən

Yığışdırsınlar ki, kiminsə gəlməyinə

Ümidimiz qalmasın

Ümidsiz olanda daha güclü olur insan...