cagdash poeziya etiketine sahip kayıtlar gösteriliyor. Tüm kayıtları göster
cagdash poeziya etiketine sahip kayıtlar gösteriliyor. Tüm kayıtları göster

23 Ocak 2021 Cumartesi

Şeir dəftərçəmdən. Virtual məktub.

 


Sənə elektron məktub yazacam.

Texnologiya əsrində duyğularımı

Əl ilə yazıram.

Hisslərim barmaqlarımdan

Mətnə süzülür aram-aram.

Qoy bir az kədərimin çəkisi azalsın,

Xatirələrim qısalsın –

Çaq-çaq-çaq yazacam.

Yəqin, səhər tezdən yazaram,

Yuxularımın rəngi qaçmamış.

Bəlkə axşam yazaram,

Yorğun ruhumun diktəsi ilə.

Elə məktub yazım ki, dramlı tonları olmasın,

Dolmasın,

Donmasın

Göz yaşlarım gözlərimdə.

Elə yazım ki, sanki hər şey yaxşıdır –

Mən,

Sən

Və başqaları həminik,

Dəyişməmişik.

Bəlkə gecə yazım – şeytanlarla mələklərin

Savaşı saatında?

Bəlkə mətbəxdə yazım – təzə dəmlənmiş

Çayın mixəkli ətri altında?

Hər şeyi birdən yazım – bir kəlməylə,

Bir cümləylə,

Olanları, olmayanları,

Ola biləcəkləri.

Bəs mən sənin nağılındım,

Noldu?

2015

12 Haziran 2012 Salı

Sevinc el Sevərdən bir şeir




Azadlıq

nə qədər ki, çiçəklər dibçəklərdə yaşamırdılar
quşlar qəfəslərə,
balıqlar akvariumlara salınmamışdı
əhilləşdirilməmişdi heyvanlar...
hörülməmişdi
dərin və qaranlıq zindanlar
kimsə bilmirdi azadlığın nə olduğunu
halbuki o zamanlar da
böyük bir kürənin içində
ölümün qaçılmazlığıyla barış içində
yaşayırdı hər kəs.


http://www.azadliq.org

2 Haziran 2012 Cumartesi

Şeir dəftərçəmdən (2012)


***
Əvvəl                              
Sevgilim,
Aşkım, həyatım,
Göyərçinim
Deyərdin mənə,
Dördhərfli adımın əvəzinə.
Sonra şirin nağıllarla
Darıxdırıcı günlərimə rəng qatdın.
Sonra
Gündəlik görüşlər
Yerini
Gecə zənglərinə verdi,
Sonra – tələsik, qısa mesajlara.

Sonra susdun.

Soyuq pəncərələrə çırpılan günlərim
Sənsiz keçdi.
Sənin haqqında fikirlərim
Səhər  dostlaşdı,
Axşam – toqquşub dalaşdı beynimdə.

Niyə ağlayıram?
Sorma.
Sənə nə...

Sima, 2012

25 Mayıs 2012 Cuma

Xatirə Nurgüldən iki şeir


TƏSƏLLİ                      

Sözlər darıxmamaq üçündür
səslər darıxmamaq üçün
Filmlər
fikirlər
şəkillər
daha nələr
daha kimlər
hər şey darıxmamaq üçündür
hər kəs darıxmamaq üçün

Hərdən də sonuncu ağacı kəsər adam
sonuncu pəncərəni qırar
dənizləri qurudub
gəmiləri qaytarar darıxmaqdan

Hərdən də daşa dönər adam;
darıxdığından götürüb
daş üstünə adını yazar
bir yolçu
« İ M Z A S I Z »
Heç kim olmamaq da darıxmaq qədər acı.

ŞƏHƏR...PAYIZ...VƏ YOXLUQ

Unutmağa başlamışam
sükut - sən yoxsan gerçəyini
çırpandan bəri üzümə

...səhər pərdələr yellənir küləyə
pəncərələr açılır
küləyə
şəhərə
şəhərdə payızdı -
yəni ayrılıqlar zamanı
payızdı və sən yoxsan

Hər gün iki dəfə baxıram aynaya
özümə gülmək və
otağımı kənardan görmək üçün
Dodaq boyasıyla
adını yazıram güzgünün səthinə
üstündən silirəm dönə-dönə
Yenə... yenə də
sən yoxsan

Şəhər - unutmaq məkanı
əyri binalar qurumuş ağaclar
hamını
hər şeyi çıxarır yaddan
Elə mən də bayaqdan
xatırlamağa çalışıram
kim idi kim idi yox olan...

9 Nisan 2012 Pazartesi

Lalə Məhərrəmli. Bir mən, bir gecə



Yenə tək qalmışıq..
bir mən..bir gecə..
Yenə otağımda mən boyda gecə.
Yenə biz əl-ələ tutub gecəylə.
Dərdlərin üstündən keçəcik bugün.
Yenə pozmayacıq adətimizi.
Doyunca göz yaşı içəcik bugün.
Alar əllərimi qara ovcuna
Əlimin kirlərin gizlədər gecə.
Sıxar sinəsinə xəstə ruhumu.
Məni günahlardan tərlədər gecə.
Yenə tək qalmışıq
Bir mən..bir gecə.
Gecə kipriyimdən asar özünü.
Gecə nəfəsimdən dolar sinəmə.
Gecə saçlarımla boğar özünü.
Gecə ulduz olar yağar üstümə.
Yansın binaların gur işıqları.
Gecəmi əlimdən alan olmasın
Zülmət qaranlığa büründüm..
heç kim
Gecəni əynimdən soyundurmasın.
Ehh..Gecə tökülməyə başlar üstümdən
Günəş otağıma dolar gizlicə.
Sinəmdə, saçımda, kirpiklərimdə.
Mənimlə sabaha çıxar bir gecə.
Yenə tək qalarıq..
Bir mən..bir gecə


http://www.azadliq.org

15 Şubat 2012 Çarşamba

Aqşin Yenisey. Yeni şeirlər



Eşq

Mənə göz ver, işıq vermə.
Göz-gözü görməyən qaranlıq ver.
Ayı da olmasın, ulduzu da.
Səni gəzim, axtarım o qaranlıqda.
Mən səni tapmaq yox,
axtarmaq istəyirəm həmişə.


Qüssə

Öləcəyik!
O da, sən də, mən də...
Birimiz qürbətdə, birimiz yolda, birimiz vətəndə.
Sonra yenidən doğulacayıq.
Birimiz enliyarpaqlı bir ağac kimi – meşədə,
Birimiz ətirli bir ot kimi – çəməndə,
Birimiz ağ yumurta kimi – kirli bir hində.
Gəlin, indidən tanış olaq ki,
O zaman bir-birimizi
Yarpağımızdan, ətrimizdən,
rəngimizdən tanıya bilək,
Darıxmamaq üçün...


Pəncərə tərinə yazılmış şeir

Sinəndən ötrü darıxıram,
Daha doğrusu, ürəyinin səsindən ötrü.
Gəlməyindən ötrü darıxıram,
Daha doğrusu, gəlməyəcəyindən ötrü.
Darıxdığımı biləcəyindən ötrü darıxıram,
Daha doğrusu, bilməyəcəyindən ötrü.

http://www.azadliq.org

23 Ocak 2012 Pazartesi

Rasim Qaraca. Bu gün yağış yağdı oturub səni düşündüm...



Bu gün yağış yağdı
oturub səni düşündüm
hava sərin
nəfəs aldım bir az
islanmış torpaq qoxusu doldu burnuma
ağacların küçəyə doğru əyildiyi bu mənzərəni
gözlərimlə kopyalayıb
sənə göndərdim düşüncələrimdə
səni çox sevdiyimdən deyil
sadəcə öz sevincimi
başqa birisi ilə bölüşmək istəyindən
heyrət etdim islanmış tüklərini yalayan pişik balasına
onun kainatla bu qədər iç-içə yaşamasına
şübhəm yoxdur
böyüyüb əsl pişik kimi sevəcək bir qadını
çünkü yalnız yalınayaq gəzib
günəşdə yanan
və yağışda çimən bir insan…
yanıldım
bir pişik bilər əsl sevginin dadını
biz insanlar uydurmadıqmı ayrılıq sözünü
ayrılığın nə olduğunu bilirmi deyin allahın bu yağışı
əgər hər axışında sevdiyinə qovuşmaq varsa
əlimlə toxunum yağış suyuna
seyr edim maşınların üstündəki damlaların bəxtəvərliyini
üzümdən əksik olmamalı təbəssüm
ibadətə başlarkən
gövdəsi qabarlı bu ağacın dərgahında
indi anladım ibadətin nə demək olduğunu
sevincini başqa birisi ilə
ola bilsin allahla bölüşmək kimi bir şey
Silinirmiş insanın bütün günahları
yağış gölməçəsinə əyilib göy üzünü seyr edərkən
bu ozonlu mənzərəni sənin də görməni istəyirəm
həyat nə qədər maraqlı olur
sənə sevinc verən bir şeyi
göndərəcəyin bir insan varsa
yalnız indi anladım
kainatı toplamağa başlayır insan
başqalarını düşünərkən
Yalınayaq gəzib
günəşdə yanıb
dodaqlarımda tər damlalarının duzlu tamı
istini isti bilib soyuğu soyuq
topladım gülüşlərini cəmi bir ovuc
Yalnız indi anladım əsl sevginin nə olduğunu
yağışdan bir saat sonra
günəş əyiləndə axşamçağına
ayaqlarımla düşünməyi sınadım
bu adamsız küçənin
tən ortasında…

kulis.az

1 Aralık 2011 Perşembe

Nərmin Hüseynzadə. Evimizdəki bütün bıçaqları danladım səhərə qədər



Biz üç dost içib-içib ağladıq gecədən bəri
yemədik, yatmadıq
udum-udum hava diləndik, nəfəs diləndik
boğazımıza sarılan əllərdən
qopa bilmədik, bilmədik
evimizdəki bütün bıçaqları danladım səhərə qədər
olmaz, dedim
adamın ürəyinə batmaq olmaz dedim...
bütün əllərə nifrət elədim...
biz üç dost udum-udum hava diləndik, nəfəs diləndik
səhərə qədər
içib-içib ağladıq...
əşyaları yerə çırpdıq, ortalığı dağıtdıq.
bağırıdq
yorulduq
gözümüzdən yaş əvəzinə, qəzəb damladı
kürəyimiz ağrıdı səhərə qədər
sənə dəyən bıçaqların soyuğunu hiss etdik canımızda.
bu gecə içkilər daha acı oldu, siqaretlər daha çəkilməz...
çəkilməz oldu, başımızdan ağrılar, çəkilməz...

kulis.az

26 Ekim 2011 Çarşamba

Xuraman Hüseynzadədən bir şeir




***
Yuxusuzluq
“pəncərədən bayıra bax” deyir…
Açıram pəncərəni,
şəhərin hələ insan nəfəsi dəyməyən
saf havası
atır özünü
taybatay açılan pəncərədən
evimizin ağuşuna…
Dan yeri ilmə-ilmə söküldükcə
şəhərin eyibi açılır:
küçələrdə insanlar görünür,
səs-küylü maşınların arxasınca
tüstülər sürünür…
Şəhər oyanır…
Yatmaq zamanıdır.

http://kultaz.com

Təbrizli şairə Ülkər Ucqar. Nağıl qadın kimidir


*

“getdim” de
özünü də, məni də qurtar!
nağılı deməyincə bitməz
yerlə göy arasında
gərgin düşübən qarğayar başlayanını...

“atdım” de
özünü də, məni də qurtar!
nağıl yarıcan olanda
asılı qalar
bir ömür, deyəninin dalısınca sürünər
qiyamət günü
sonunu istər...

nağıl qadın kimidir,
unutqan gözlərini yumsan da,
tanıyar səni!
unutqan əllərini gizləsən də,
tanyiar səni!

“getdim” de, özünü də, məni də qurtar...
“atdım” de, özünü də, məni də qurtar...

http://www.azadliq.org